好多人進入大灣區市場，都遇到一個字，唔係好明白，就係「卷」字。
成日都話好「卷」，市場好「卷」，讀書好「卷」，究竟係乜嘢意思，其實係過度競爭嘅意思。
但咁樣似乎唔係好具體，所以我引用內地一個好流行的故事可以好具體解釋下。
情況就係你練緊紫霞神功，但你嘅對手練緊寒冰神掌，雖然你好努力，但你地點練都係你打晤過佢，佢打晤過你，因為對家都好努力。
於是你把心一橫，引刀自宮，練辟邪劍法，對手見到你練辟邪劍法，也急啦，於是亦都把心一橫，來個咔嚓，練個葵花寶典。
到你練成辟邪劍法之日，發覺對家原來練成葵花寶典，結果仍然係你打晤過佢，佢打晤過你，不過你兩個都已經廢左。
呢個，就係「卷」。
故事好好笑，但內裡好殘酷，所謂「卷」到連蛋蛋都冇，其實就係寓意企業本身為左贏對手，連自己利潤甚至企業前途都犧牲埋。
我發覺好多人都錯誤人為內地係低成本市場，我覺得內地生產生本的確比香港低，但絕對不是全世界最低，印尼，印度，就比內地市場成本低好多，但過去10年證明，好多把生產基地轉移過去的，大部分要返返黎，我地逐漸明白，內地贏的並不是低成本，而是高新性價比。
過去10年，我地仍然見到好多成功嘅企業及產品，在內地非常成功，例如黃道益，維特建靈，珍妮曲奇，香港製造及香港獨特品牌，仲有香港的國際服務例如保險業務，財富管理，國際法律服務，香港嘅教育及學校等等。
所以，一定要避免同內地同行避免正面交鋒，尤其是避免鬥價，因為唔知點解，你永遠發覺內地市場總有人有辦法比你出低一口價。
因此，你要做的，是依賴你的香港獨有優勢，提出你產品及服務的其中一個點是內地公司做唔到嘅，或者係搵出一個細分市場，你提供的服務係好少內地人做到，並且對於佢地有一定技術或者是身份門檻
好多人話：唓，邊有甘易，冇錯的確係冇甘容易，但做生意從來都唔易，如果好簡單用香港個種一買一賣思維，就想進入內地的內卷市場，哪怕比你好幸運打開市場，只要同行發覺你嘅產品服務原來有錢搵，又好容易入行甘攞到同樣嘅貨，或者提供同樣嘅服務，甘你嘅利潤好快就會被人「卷」走。
係內地市場要立足，一定要搵出自己生意的「護城河」，你的行業護城河是什麼？出面有好多商業導師有教導，但我認為去到最後，這是每一個企業老闆自己要解決的問題，畢竟生意是你自己的，你有責任去搵出最關鍵的那塊puzzle。